形容港股過去一周是小股災，並不為過。恒指上周收報17668點，一周喪跌9.2%；若以去年11月高位24988點計，跌7320點，跌幅29.3％，早已進入熊市。如果睇中小型股份，過去幾個月跌50％以上的比比皆是，總之有衰又跌，講唔出有乜衰亦跌，災味甚濃。
跌浪由美國聯儲局開會宣佈無QE3（第三次量化寬鬆）觸發，正式係唔放水就散水，當日我一聽完聯儲局會議結果，就認為美元會升，美債會升，股票要跌，外匯要跌，商品要跌，結果真係出現這種大趨勢。
金銀暴跌 衰過股票
股票唔算跌得多啦，你睇上周五黃金大跌4.9％，收1655美元，一日內高低位差128美元！兩日內唔見9%。白銀仲誇張，上周 五的一日急插14％，收31.1美元，若果炒孖展輸2％時唔肯打靶，最後可以輸間樓。
呢
個美元升、股匯商品插的方向，唔易扭轉，未來主要看歐債危機如何發展，總體感覺係「衰多過好」，因為見唔到歐洲國家、特別係德國等北方富國願意恨下心腸去解決問題。有希臘報章報道希臘財長維尼澤羅斯正考慮向國會提出解決希臘財困的不同方案，包括向希臘國債債權人要求削債50%的有序違約方案，希臘政府隨即否認報道，市場卻深信希臘正考慮相關方案，認為希臘無可避免要違約。
若我估計美元升、金股匯跌的大方向正確，熊市會反覆愈走愈深，雖然當中有反彈，但不要被反彈走勢迷惑，個市已經「熊到唔恨」，無謂再自己呃自己話而家係「牛市第二期」啦。大家要面對現實，改變觀念，適應熊市來臨的各種變化。
&nbs p; 我認為有幾點要留意，第一係樓價超貴，想買樓都要忍手。我在9月頭已寫了一篇網誌，話而家係熊市唔係牛市，在熊市唔好掂貴價資產。如今股市已經一浪跌落，樓市尚未大跌，更凸顯樓價太貴。不同資產都可以比價，主要比的是資產帶來的收益，公司的收益是盈利，樓宇的收益是租金，如今好多大公司的市盈率都跌到10倍以下，換算成樓宇的租金收益率，10倍以下市盈率的公司等如樓宇收10厘以上租金，當然沒有能收這種租金的樓。
正好相反，自從樓價大升後，租金升幅追不上，變成租金收益率急跌，好多樓租金只有3厘，如果計豪宅，只有1、2厘租金收益的比比皆是，山頂樓或那些3、4萬元一呎的半山豪宅，只有1厘租金收益，等如100倍市盈 率，即是要收租100年才會收回買樓的成本，你話幾貴？
樓價超貴唔好沾手
樓價咁貴只建基於一個幻想，樓價未來還會升，這是個打傻瓜的理論，我咁貴買雖然傻，但下一手會有更傻的買家，用更高價錢接我的貨（例如內地買家），但當音樂一停時，這個買貴貨的人才發現，他已是最後一個傻瓜。在跌市開始時，不要想食到盡，想想如何令自己不做最後一個傻瓜更重要。
若果你手上有投資物業，本來只是想炒圖利，遇見這種市道，要減低持倉，控制風險，把手上多蝕的貨止蝕、止賺離場。想買樓的用家就一都唔使急，唔好見樓價跌少少就急急忙忙撲入去，驚死樓價馬上又升番上去。
; 在這種經濟環境下，樓價本來都唔存在上升的基本因素，而政府增加賣地、甚至復建居屋的影響，也要3、4年後才浮現出來，唔好咁老襯見佢跌5%、10%就撲入去，想買樓要忍。
第二係股票未跌完。唔好以為股市插咁多已經差不多，我估個市未跌完，關鍵係歐美情況再惡化時，股市大方向仍然向下。當然短線跌咁多，會有一反彈，但熊市的特點是一浪低於一浪，上次浪底隨時變呢一浪反彈的浪頂（如19000點），當個市快速完成反彈後，又會再跌。
跌浪未完低到唔信
到股市最後一跌時，由於基金要錢唔要貨，強股也會翻艇，好似中移動（941），佢股價咁硬淨其中一個原因是有2700億人仔現金在手。但到股市插到阿媽都唔認得時，隨時傳出似是而非的壞消息，這些強股也無法獨善其身。唔插強股，個市未見底。
熊市炒股逢高減持
第三係商品匯市危機續來。我見到有分析家話唔信股票唔信美金，叫人去買金。我就話出現大災難時，情況會剛剛相反，無好信唯有信美元，美元會暴升，貴金屬和商品會大跌，所以見到黃金回吐，都唔好撲入去。
最後想講講熊市基本投資策略。
若在牛市時策略是逢低買股，熊市的策略是逢高減持，保留部份資金在驚天跌市買平貨。因為大市是一段段向下 ，基本策略是高沽，這種市道只會沽低，唔會沽錯（等如牛市只會買貴，唔會買錯的相反），因為沽完即使升上去，最後都會落番來。雖然我認為長線投資買肯派息的好股，未必要清倉，但見反彈減持一部份，等插低時番，可以拉低平均成本。至於短線炒作，做沽家易做過買家，買貨宜短，嚴守止蝕。
沽貨可以稍長，食盡跌幅。最後記住呢波動市，任何人睇市都可能錯（包括我在內），但叫你控制風險就一定無錯，炒升又好，炒跌又好，量力而為，千祈唔好孤注一擲，唔好俾自己一舖清呀。
陸羽仁
沒有留言:
張貼留言