財富龜兔論你可能會問點解要買樓致富?
買股票都可以致富，儲手錶都可以致富。筆者認為買用按揭買樓然後好似隻龜咁每月供樓反而幫你儲到錢。
你會問而家唔係講投資咩? 做咩叫人儲錢? 筆者建議你無番一百幾十萬係手，都係集中精力打好根基儲錢好過。你可能會問做按揭買樓等個價升咪仲爽? 好似隻兔仔咁跳上去搞掂哂!
對唔住今時今日筆者都無信心花幾個星期就同你搵到個實賺錢既盤。如果有agent咁「俾面」想係度推介下佢實賺錢既盤，請你係呢篇既回應欄做。當然你會話時下年青人支出又大又要養父母，筆者根本唔知你既艱辛，唔知道連儲十萬蚊佢都有幾困難。
其實每人都有自己艱難既地方，你浪費時間去比較人同自己根本就同三姑六婆講人是非既行徑無分別。
今次故事既主角阿May，28歲，佢同男友拍拖4年，同好多女生一樣想趁後生拉埋天窗。阿May係一個公司秘書，「女人仔」一個。相反男友阿Jean很有主見，現為一個收入穩定既公務員。阿May作為一個公司秘書，佢事業心不重，只想同男友結婚之後擁有一個平淡既家庭生活。可能係細時深受父母離婚打擊，阿May只想男友係婚後錫佢及照顧一齊住係公屋既母親。
有一日，May問男友會唔會去睇樓，阿Jean只係話而家樓價咁貴，睇都冇用。May月入只有$10000蚊，而阿Jean則有$15000。Jean其實都想同May結婚，只不過因買樓結婚支出龐大，唯有晚晚度橋睇下點樣儲夠三至四十萬擺酒同買樓上會，佢計過連Personal Loan都借埋，都未計掂條數。
龜咁一步一步儲May有次同朋友訴苦無錢結婚，朋友話點解佢將手上5萬cash放係薄仔都唔買些少股票，May話:「唔買股票既人最有錢。」原來May媽係離婚初期想靠股市獲利維持離婚前既生活水平，成四十歲人先學人初買股票最尾緊係輸大錢，攪到佢要搬返公屋住，所以告誡女兒投資都係保守為上。
May唔想就咁企係度等男友儲錢結婚，唯有自己帶飯上班食lunch每月儲起$5000。 Jean要出街同人食飯應酬，每月只可儲起月入三份一，即$5000。佢計過一年就咁儲先得$5000*12=60000。三年儲埋只係得廿萬，夠結婚都唔夠買樓。佢睇報紙見有個十萬倉組合開倉兩年都有300%回報，心諗佢有5萬cash跟住買都可以。開頭手氣極順，一個月後已經由5萬炒到12萬，佢心諗自己仲勁過個專欄，一個月就賺成倍有突。佢開始每日用工作時間鑽研專欄，上網學牛熊炒賣，將自己每月儲到既$5000放哂入去股票市場。
另外，佢同自己講分散投資十分重要，為左令自己風險降低，佢分別買入股票同牛熊證。如是者又一個月，今次股票令佢蝕左兩成，佢話自己勇敢止蝕，係專業投資者既表現。牛熊證竟然比佢賺左一大筆，令自己筆錢由12萬升到20萬。佢心諗返工都係多餘，自己係屋企炒兩個月都賺左成廿萬咁滯。
兔仔三級跳有廿萬係手既Jean，意氣風發咁叫女友同自己去睇樓，因為佢心諗到下個月保守計都有25萬係手。女友話媽咪附近既居屋屋苑未補地價只不過一百萬一間，佢話又近媽咪可以同佢食飯慳返煮食時間。Jean話買居屋唔保值，大談佢既投資角度同埋下一步炒樓致富既方法。Jean睇中左荃灣爵悅庭一個三百萬單位，有會所又夠型仔。女友一聽到管理費成$2.2一呎，就猛咁話貴，同Jean講呢個612呎單位每月成$1400蚊管理費，如果每月銀行按揭還多$1400蚊已經可以借多$200000萬，買一間大D既屋。Jean堅持己見，話唔想再住係舊居做「公屋仔」。佢話一年管理費都係$16000蚊左右佢話咁快就搵到。
May問佢人工唔係得$15000架咩，Jean當然唔會同佢講呢兩個月佢已經係股票市場賺左廿萬。 供樓只會越黎越輕鬆Agent見佢地年紀輕輕，開結問佢地想做幾成按揭上會既問題。阿Jean話自己三五七年一定還哂個貸款，佢做人只係會賺錢而唔會爭人錢。
相反老婆黎睇樓之前已經睇過書，佢知道做個按揭分廿幾三十年還，每個月定額還一萬幾千，其實隨物價上漲十幾廿年之後一萬幾千都唔係D咩，可能搭程火車都要成萬蚊，所以攤長供樓只會越黎越輕鬆，更搬出借港元等於沽空美元既理據。當然May連買股票都唔識佢緊係講到九屁不通，Jean哥唔係幾想同May講，「西面」之後就行出左地產鋪。
兔仔未日Jean終於係兩個月之後首次係牛熊證蝕錢，佢用10萬買隻熊仔比恆指好友由16000點夾到上19000，隻熊仔係18800已經打靶未有淨餘值。佢心諗唔衰得，既然已開始睇樓要快手追番比首期，只好用淨番10萬買隻恆指未日論。佢搵左隻法興仲有8日到期行使價18800點既put輪，心想只要輪證一由價外變做價內佢就可以大賺一筆，如果恆指真係再升佢就即刻放左佢，希望攞番呢次十萬本金既部份。點知恆指係買進之後竟然係19000點唔上唔落，佢係當時先發現原來未日輪係臨到期既時間損耗係咁犀利，佢係到期前兩日放左隻輪，執番(輸淨)3萬。四個月埋單阿Jean由5萬變成3萬，雖然只係蝕左兩萬蚊但係阿Jean好似輸左成百萬咁極唔開心。佢都諗唔明點解輸些少錢都可以咁sad…既然開始左睇樓，阿Jean唯有頂硬上睇落去。而家阿Jean副身家得番3萬，應承左阿May負責首期既佢都唔知點算。口風一轉唯有去睇番居屋，見女友心儀既居屋只係要十萬蚊就可以上會佢都拎唔到筆錢，真係好後悔之前用哂D錢同時間買股票。
幸好May見到Jean面有難色，主動咁講自己呢幾個月都儲到3萬蚊，可以出到8萬。佢地夾埋哂兩人的cash都有十幾萬，終於可以上會。Jean真係「O哂咀」，女朋友搵咁少人工儲錢仲快過佢。買樓之後，Jean每月都要攞成三千蚊出黎夾埋阿May供樓，佢感覺每個月放幾千蚊落間樓仲實在，起碼每晚唔使睇美國市到兩點幾都唔願訓。好快佢就應承左女友去細bank做下零存整付，為籌備結婚努力。
龜縮政策! 有時零回報已經係一個唔錯既回報其實放錢去供樓一定賺咩? 你可能會諗三十年後供完間樓未必比買入價升左。 有人會拋出一大堆美元眨值，資產長升既道理。其實筆者唔會叫你諗咁多，你著實每個月供入去間樓度，筆錢起碼仲係度。你成日諗點樣將筆錢賺取回報，三兩下手勢就輸鬼左。當然以上不適合於股市長勝長有既人仕，不過股市大部份參與者係輸錢筆者是同意的! 你可以多睇骷髏會既博文增加你股票市場既勝算! 更大既發現係，同好多年長既uncle傾計之後，我肯定零回報已經係一個唔錯既回報，佢坐係喜來登頂樓既coffee lounge同我傾計係因為佢生意賺既錢比佢投資蝕既多好多。
多得私人銀行，uncle係其中一個比private bank sell左入飛做2208既國際IPO配售，隻2208由17蚊「瘋」到得番3蚊，佢計埋冇左成球美金。而家望住手頭上另一份保本基金已經覺得好欣慰。 女人比男人投資叻?「女人比男人投資叻」? 雖然唔係幾想承認不過係真確既。通常女人最失敗既投資係感情上面，但女人係錢銀理財既優勝係解得到，筆者眼見得到。
一般女仕們沒有男士那份自信，所以唔會將佢筆錢「亂咁舞」! 出入市場次數少反而令贏錢機會大增。況且女人係拍拖階段已經著緊為自己儲錢及逼另一半儲錢了。由於青春有限，女仕們更會深思自己後生時的決擇及較偏向保守選擇。
眼高手低所以有D女人會「令你覺得佢好低能咁」做4%龜速年回報既儲蓄plan，又或者搵埋D保本計劃，而佢所得既幾個%回報，可能係佢身邊既男人投資成世都achieve唔到。所以千祈咪笑人買埋D「低回報產品」，因為「低都好過負回報」。好多人眼高手低，口頭成日講面前呢個投資回報有幾唔好，有幾唔著數。可惜自己就買埋D垃圾股招致損失。投資贏錢少部份靠資訊知識，大部份係要贏在心理。你買中隻十倍股可以當係bouns，但係「持之以恆，緊守規律」既投資原則先最令你無往而不利。
好多人想學阿Jean咁靠股票快去滾大筆錢去做買樓首期，到後來發覺身邊齋儲錢既朋友比首期買樓仲快過佢。所以如果你係一個過份自信既年青人，或者已婚但仲認為自己投資輸錢只不過係冇運既人，請考慮將部份月薪攞去供樓，慢慢用人生餘下既幾十年先加大投資股票既金額都未遲。緊記筆者唔係叫你唔好買股票，只係筆者認為如果可以返轉頭，我都會「多儲錢，少買股」。
人來說樓宇更加是遲早要用到既必需品。況且係街邊不同產品廣告既不斷引誘之下，一出糧就儲起供樓算是不俗既選擇! 係投資金錢之外，請你記緊投資在你的健康同家庭。畢竟錢財都係身外物，同屋企人開心咁食完飯散步先至係最重要的!
沒有留言:
張貼留言