公用股、REITS等收息股係2013年上半年升勢凌勵，雖然無科網股或者濠賭股升得咁多，但係買一隻本來諗住每年執幾厘股息穩穩陣陣既股票突然一年內升兩三成，都幾喜出望外架，可惜自從美國話準備退市之後，就即刻出黎行，預左要還，好似電能、置富REITS等跌番兩三成，股價還原基本步。
呢類收息股表面上業務都好似缺乏增長因素，公用股受到政府利潤管制制衡著，REITS隨著地產市場冷卻而缺乏加租理由，就算美國之後話左長期維持低息環境，市場上利潤更高的投資項目都大把，國內有餘額寶、微信理財等高息儲蓄產品，香港股市有濠賭股、科網股等，有概念、有走勢！收息股兩樣都無，吸引力梗係大打折扣。
根據「息率 ＝ 股息 ／ 股價」呢條方程式，股息無增長，想增加息率去增加吸引力，唯有股價下跌。 前段說「呢類收息股表面上……」咁實際上又如何？先講公用股，利潤管制只在香港，不過眾所周知兩電一煤早已國際化同埋多元化，好似中電有大量海外業務同埋有賣樓收入，電能就集中海外業務，並且將港燈分拆上市，煤氣也透過持有港華燃氣投資大量國內項目。
另外上市的載通（九巴的控股公司）同埋港鐵的車務收入都係佔集團整體一小部份，中巴、香港小輪更加係掛名公用股，因為兩者業務都集中地產發展了。
至於REITS例如置富，泓富等本身只係獲注入二線商場同寫字樓，接手後可以重新裝修同規劃轉型，例如置富旗下的商場經轉型後格局同感覺都好左好多，咁樣租金收入就自然有上升空間。 無論係透過投資海外抑或upgrade自己資產，都係投資期長回報期更長的項目，所以資金就算洞悉呢個機會都寧願炒多兩轉高增長野先會考慮，咁樣就即係製造機會俾大家趁低分段吸納，有錢不妨開始月供呢類收息股，中長期必定有驚喜。
梁隼
沒有留言:
張貼留言