財務自由是人生計劃的一部份

轉載: 人生的計劃   (80后求生隊長)

有朋友同我傾吐自己的成長故事，複雜傷心的情節令佢自己慢慢變得悲觀，雖然外表佢仍然堅強，但其實佢對呢個世界已經無乜希望，認為人生亦無必要計劃太多，反正好多野都控制唔住，今朝有酒今朝醉，一轉眼就十年就過去。箇中情節我亦無太深的討論，亦明白好多野有時都唔係可以操控係自己手入面。

不過以上的觀點，隊長我又未能認同，特別係放棄自己浪費左好多時間係盡情享樂而沒有建築自己的人生計劃，呢下就更加令我感到可惜。

如果佢的故事，有好多野都係佢控制之外的，我問佢咁佢控制到的野，你又做過D乜先？你未必可以控制你身邊的人點諗，你未必可以控制人的健康，但你連可以控制的自己都無盡過一點努力，反而選擇逃避唔去面對現實，咁就一定無人幫到你。

當然，重覆的打擊可能會令你氣餒，不過一個人的人生點样去編寫，只有你自己先可以企得番起身，一時兩時三時的打擊，你可以靜靜地休養，但休養完哀傷完就應該重新出發，因為人生並唔係因此而完結，相反只要努力，先可以為未寫的人生譜出更精彩的彩虹，如果唔係，你又點可以為你同你關心的人改變過去，從傷痛中走出谷底呢？

人生咁多煩野，其中一样當然又走唔甩係錢銀。對於呢個朋友黎講，錢銀佢唔係太旨在，亦唔係太計較，隊長同佢講我話你呢個態度是正確，不過基礎上卻有問題。

有D人有錢人，有錢但仲好計較錢，係一件幾PK的事；而你就係瀟灑哥上身，無錢又唔計較，咁唔怪得你都無乜將來；而隊長認為要達到的，係你從錢已經釋放出個枷鎖，即你可以相對的財務自由，咁你就可以做你中意做的野，比更好的野你關心的屋企人，比更多的時間去陪伴你屋企的人。

其實對於佢係一個無計劃過人生的人，佢未必會明太多，特別係佢仲沉淪緊係自己所煩惱的泥沼入面，又點會有時間思考，計劃同實踐財務自由？不過，而家的佢其實已經走出左大部份的煩惱，只係自己唔放過自己的話，實際上無乜野可以做到。

但我同佢講以佢目前的年齡同狀態，其實個起步已經慢左人地十年，而如果你再浪費自己時間，你隨住年齡增長，只會越來越痛苦，越來越無希望。

財務自由，唔係一個乜都可解決的金丹，之不過可以劃左一條底線，令你有更多的時間同金錢去應付人生如意同不如意的事。

好多野唔係我地可以掌握到，有時叫你要quit左份工去處理你走唔甩的事，好多人往往都無法安排。

財務自由唔等於幫你解決左所有野，但只少你會諗少個$$$的問題，去全力應付;

不過真係仲有好多人都唔係好睇到財務自由的威力。