2014年10月19日 星期日

25歲的你其實有八千萬

八千萬,如果唔係中到超級六合彩,一生人要搵到呢個數字,特別對於同我一樣係八十後的朋友嚟講絕對覺得係遙不可及,窮一生精力都未必搵到。
的確,六合彩、過大海可以幫大家一朝致富,但係對我呢啲機會主義者嚟講,此等負期望值的遊戲只有一億五千萬元這異常的情況出現時,才有值博率。
其實要中頭獎不一定要靠運氣,只要你有恒心、決心就可以。
福布斯曾經有一個虛構人物的富豪榜,當中喺2011年排第二的是《暮光之城》中Edward的父親Carlisle Cullen,福布斯話佢致富的方法係透過三百多年的複利增長同投資增長令佢身家可以贏到Ironman Tony Stark同Batman Bruce Wayne呢兩個虛構大富豪。雖然人物係虛構,不過個理論非常真實。

儲錢投資 持之以恒


同大家計一條簡單的數,假設大家係一個正常的八十後,大學畢業出嚟做嘢開始,每月儲4,000元,返咗三、四年工,啱啱25歲,都儲到10萬元本金作為起步。每月儲4,000元?個個月人工先得萬幾,又要家用,又要裝身,仲要換iPhone6 plus,對上部電話仲未供完呀,一個月點儲4,000元?我相信事在人為,我有一個朋友曾經喺四大會計師樓做,佢一開始時月薪只有一萬多元,而佢為咗儲錢結婚同買樓,出去做多份兼職,辛苦程度不言而喻,結果他在三年內儲得接近50萬元並成功上車,佢嗰時每個月儲接近一萬。如果用複利率計一計,你現在每花的4,000元,到你60歲時可以變成10萬、20萬元,甚至50萬元時,你仲捨得使呢4,000元嗎?

為方便計條數,我當每月儲起的4,000元喺嗰年唔投資,年底時才一次計入資金做下一年年頭本金,假設平均每年投資回報為16%,即係第一年年底(26歲)就會有11.6萬元加上你當年儲的4.8萬元,總共16.4萬元,並以此作為第二年起步本金。
去到呢度,大家可能會諗16%回報點拎呀,我買層樓收租都得4厘回報咋。所以學曹Sir話齋,後生仔唔好淨係諗買樓,諗吓點樣增值你的財富,其實過去50年間恒指計及股息複合年度化回報有成15%回報,而煤氣(003)、長實(001)等大型藍籌回報更唔止呢個數,即係話,只要你平均跑贏恒指1%便可獲得你的頭獎。搵16%回報只係技巧,最重要的係你要有明確的目標同埋一個啱的方法,一億五千萬、八千萬、三千萬都只係一個數字,只要你用對方法,持之以恒,你可以得到同等價值的頭獎──財務自由。

當你好似上面咁做又持之以恒,到32歲時,屈指一算,你已經晉身成為一個百萬富翁,而46歲時你已經係一個千萬富翁,60歲時,你的財產已經去到八千三百三十多萬元,到時你都可以同人講一句「你今日冇!但你將來會有!」。
有傳愛因斯坦講過:"compound interest is the most powerful force in the universe"無論佢有冇講過,人搵錢不如錢搵錢,只要你開始計劃你的未來,複利增長同時間會幫你的財富增值,幫你中到頭獎。搵錢只不過係一個過程。
當你得到頭獎,價值在於可以自由自在做自己喜歡的事情。
《小王子》的作者Antoine de Saint-Exupery亦說過"A goal without a plan is just a wish"(沒有計劃的目標只是希望)。
25歲的你、八十後的你,擁有八千萬係你的希望定係你的目標?
灝昇

2 則留言: