經濟熊市 股票牛市

上周五港股收市後，期指夜市跌近700點，美國道指亦跌近300點。近期開始多人相信港股已進入牛市先嚟跌，係震倉定中伏？

當股市上升時，無論講甚麼理由，只要結論係升，聽落都會似層層。但有一個理由香港人應該特別感同身受，就係生意難做，賭場就旺，尤其中國人出名鍾意賭。似乎我哋都有一種觀念，就係牛市應該係由盈利帶動，經濟好轉，生意暢旺，所以前景看高一線。但經濟轉差時出現牛市其實亦常見，例如八十年代末嘅日本，所謂供樓供三代嘅時代，以及九十年代嘅香港，股樓狂潮時代。

兩者分別在於，經濟好景下的牛市，市底比較穩健，投資者可預期公司盈利持續有增長，能夠隱約感覺到何謂高位，例如當見到盈利冇得再升而市盈率太高時。經濟差下的牛市，市底係虛，大家都只係博自己唔係最後接火棒者，即所謂herding，近期中港股市如是，歐洲債市亦如是。

有一些經濟轉差迹象大眾都已可感受到，例如遊客減少、舖租下跌，但唔代表股市會因此而下跌。當此其時反而容易催生博一鋪嘅心態，反正老老實實去營運一間公司都唔夠交租同燈油火蠟，不如股樓炒一轉。其中遊客減少同港匯有關，今日你會想去邊到旅行？日本、歐洲吧，因為錢平。相對地，美元強勢香港就錢貴。香港錢貴對股市亦有影響，調轉睇，如果你係日本人、台灣人，覺得自己嘅貨幣會下跌而美元會升時，你唔想去香港旅行，但會想將部份資產轉為美元資產，尤其出入容易嘅資產。

港股見頂前應會見到好多公司批股、供股抽水，指數繼續升但你會發現手上好多股唔知咩事跌咗兩成。未出現咁樣情況而突然大急插，就係出現突發性經濟危機，現階段相信不致於此。但當然要常懷怵惕之心，明白經濟差下升市市底虛。從技術走勢角度，日經20000點、德國12500點、滬綜指4200至4500點都係轉折期。港股相信有調整，未升完，但如果稍後見到周圍都跌市時，就要十分謹慎。

Mr. Tregunter