四千變五百萬

年輕朋友說起了要努力儲蓄，覺得她很有志氣，很生性，又不禁令筆者想起了一個真人真事，當然，由於本欄一向不作個別股評，以下的股票就用「某大藍籌」來代表好了。

那是在1985-86年間的事，很多朋友大概未出世，那時的大學只有兩間，HKU同CU，大學生一間U頂多千零二千人，BA只有CU有，一屆只有百零人，三間書院六個系，一個書院一系只有廿零卅人，當時入BA好似中左狀元或六合彩，名單賣曬孖頁中英文報紙架！未畢業一般「賤賤地」都有三份大行Management 工做，通常返兩三年工唔跳槽就升正經理，跳槽就梗係V.P.，Associate Director果家野啦，做i-Bank或者如M?kinsey果類門高狗大，一般捱幾年醒目啲撈到百萬年薪，大有人在。

那時因為周潤發的一套電視劇，人人都叫大學生做「U仔」。那麼，我們今天要講的故事主角就叫U仔吧！

話說CU當時係四年際，U仔讀緊Year 3，因為多得一位靚師妹關照，而且又係當時小數能操極流利英語嘅人，暑假搵倒份絕世筍工，就係係考試局為一個只有幾個外國人來考試嘅，唔知乜乜門高狗大，佢唔識你你又唔識佢，每個英文字母你都識，但係加埋就唔識果隻「荷蘭金杯(Holland Gold Cup，超爛Gag！)」專業試做監考Assistantce！

五日朝十午四，包下午茶、咖啡、鮮榨橙汁、歐陸早餐，埋單都袋左四千蚊！果陣一個A.O.好似係$8K月薪+Housing，大Firm有$5-6K，最高係I?M同炒日股嘅Nom?ra有$7K+佣，一層五百呎市區樓大概係50萬，太古城六、七十萬，大圍金獅花園好似係25萬，九至九成半按揭，年息係18-21%(沒有寫錯!)，搭巴士去新浦崗，兒家同事叫「(從)新浦頭」，不過好似係個零銀錢，真係齋袋$4K，都算幾位極人臣啦！

五天「辛勤工作」後，U仔在半信半疑下去銀行打薄，果然真係踏正九點鐘就出左四千蚊，當然係開心到唔駛上警訊啦！好了，有錢身自痕，U仔卻想不到，原來在面前出現的，竟然係一個令佢感受至深的抉擇！

當時，身痕難奈的U仔，總覺得成世人第一次賺咁很多錢係有罪咁，想快啲搞左佢，咁就出現左兩個方案:

(1) 先買對當年最串，賣$400天價嘅D?adora金間波鞋，當年金色真皮係高科技，即係今日啲I-p?d， I-ph?ne 咁上吓Feel啦！呀，應該唔止，當年著出街，有好多女爭住夾……然後，請阿媽老豆食飯，再同靚師妹吃喝玩樂洗曬佢！

理由係，做野咁辛苦，應該賞勵吓自己，而且下年畢業都預左肥仔水啦，啲錢係會繼續黎，做人飲水思源，當然唔少得請阿媽老豆食餐勁，同靚師妹果份啦！

加上U仔生性浮誇愛扮野，鍾意扮浪漫，即係例如三更半夜失驚無神搞到人地成個門口都係白色鬱金香、紫色玫瑰花，鬼鬼祟祟攝住封用羽毛筆寫以為好High，其實係人地要一邊查字典，一邊問番你點解嘅爛鬼十四行意大利情詩果隻……(又唔諗吓人地屋企人分分鐘誤會以為係痴線佬追數，搞到差啲報警呢可！)

(2) 買「某大藍籌」，一手400股，$10股，正好$4K。理由係衰衰地U仔都有Finance底，雖然係走堂王，GPA年年都有3.9，都有「專業良心」嘅，為明日長線投資，好正路嗟。而且當年一年有差不多8%股息，複息增長，話就話十年都有成……啦！(車，咁大把！)

結果係點呢？

那年代沒有Internet，銀行亦冇散戶股票買賣，要就一定要去證券行開戶口，仲要有介紹人同擔保人果類，而且$4K係唔夠買一手「某大藍籌」的，因為有佣要比加嘛！所以，本質其實幾生性同踏實嘅U仔就諗，好！就等你跌多兩格，咁迷全包宴都係$4K囉，係唔係好醒呢？

終於都等左足足「一個星期咁耐」喎，點知隻野不跌反升，仲多左兩格，敢就嘔突啦！既然咁冇緣，又唔係賺硬，一陣檔野或者間證券行執Q埋，而且十年都不過係有$……豪到你盡，識飛咩？最唔「柯like」都係間野大支野喎，幫襯你仲要介紹人同擔保人咁臭串？你洗唔洗呀？同人借都冇咁悽涼啦！三跪九叩由九龍行五體投地禮游水過泥好味？

總之，要做就只要一個理由，唔做就有一千個理由！

再加上U仔天性愛扮野，扮浪漫……

時光飛逝，一轉眼就係2010年，U仔都撈得唔錯，勉強叫做到冇人串倒佢，靚師妹很多年前同人離左婚又嫁左去外國，只是遺下一段唏噓嘅少年斷腸不了情，至於當時點洗果啲錢，除左同阿媽老豆食果餐唔知最後有冇食到，都係阿媽話唔洗啦果類，同果對而家Out到連阿伯晨運都唔敢著，重間唔中在夜冷舖見倒嘅波鞋之外，就真係乜記憶都冇勒。

敢，如果買左果隻「某大藍籌」呢?

呀，又都唔算識得飛播！

拿，過去廿幾年佢一共拆細過兩次，一次一變三，一次一變四，原來的400股，就變成了4,800股。廿五年來拉上補下平均一年6%息，若果以股代息，即係把股息換成股票蓄積起來，複合計算就有4,800x1.06嘅25次方  =20,600股(尾數同以股代息再拆細出泥果啲，豪比佢啦！)。

昨日個市跌左差不多500點，佢都係罪魁禍首之一，收市約$84，一共係$84x20,600股，即係$1,730,400咁大把囉！

如果U仔係有真才實學而唔係淨識扮野，識得廿年來做一次Trade咁大把，唔駛係97年$240樓上沽咁激，淨係係07年以$140賣左，亦都唔駛摸頂$150樓上沽咁叻勒，然後龜縮到今日，咁賤賤地都有$2,884,000嘅！

想激啲？好呀！拿，再激啲係，如果Ｕ仔真係咁有料，係08年跌到$48時又買番（唔好計埋供股$28果單，又唔好用最低時連青姐都要喊果$33計勒），今日就有60,083股，用番$84計就有$5,0469,972勒！當然，大家大可以話這是事後孔明，我地明白嘅，唔好掟蕉唔好掟鞋住，因為有人都唔BUY喎！

U仔坐在海景辦公室張大班椅，好豪咁自言自語同唔知邊個死橕，車，都發唔倒達丫，豪宅都買唔倒半間！

不過，U仔忘記了，果幾球野(「球」是財經界術語，即一百萬)，只係要佢犧牲當年果堆連自己都唔記得嘅消費(當然，孝順父母果瓣一定唔可以慳啦!)，同籃住隻買左都唔記得，香港好佢好，香港唔好佢未必唔好嘅「某大藍籌」，唔睇市，唔做野，齋坐，廿五年就兩球，醒啲嘅迷五球囉！

最後，這只是過往的事，市場、股票過往表現不代表未來，價格、指數可升可跌，這裡並非鼓勵籃住「某大藍籌」過世果隻方法，例如籃左隻８號仔，「電親型哥」，敢就真係變左係「大乜鑊」飲「大檸樂」勒！

世界變了不少，環球政局、經濟、人心亦不斷在變，所以策略要與時並進，不斷調整的。這亦不認同甚麼個個月供果啲「平均成本法」(請讀「平均成本法謬誤」)，其實不過是簡單的邏輯推理就可以攻破它的謬誤了！

後記:
筆者自從出了這篇文章後，不斷收到朋友回應提問，少不了說不知道他們今天還有沒有當年的機會。筆者不是先知，當然不知道，不過，我多數會反問:「朋友，當年之所以有此『奇蹟』，主要是因為受惠於香港經濟騰飛。那麼，你不如問一問自己，未來的中國或者香港經濟又會否如此呢？如果你的答案是肯定的話，又應該是投資在哪些地方/股票，才可以切實享受到經濟騰飛所帶來的利益呢？」。願大家都找到正確的答案吧！

Mabochi